محمود جابر يتصدر القاهرة: سر نجاحي في المذاكرة وتوفيق الله

أعرب الطالب محمود محمد جابر، الحاصل على المركز الأول على مستوى محافظة القاهرة في تخصص تكنولوجيا الصناعات الحيوية – نظام الجدارات بمدرسة مصر لتكنولوجيا الصناعات الحيوية، عن سعادته بتحقيق هذا الإنجاز الذي كان هدفًا راسخًا منذ بداية العام الدراسي، حيث قال: “كنت متوقع أكون من الأوائل، دوست على نفسي جامد في المذاكرة، وكنت بحضر كل يوم وما غبتش.. السنة دي كان ليا تارجت حاطه لنفسي وكنت ناوي أحققها بأي طريقة”.

في حديثه مع “اخبارك الآن”، أضاف محمود أن طبيعة الدراسة في هذا العام كانت مميزة، حيث واجه ضغطًا كبيرًا بين الجانب العملي والنظري بالإضافة إلى المشاركة في المسابقات، مشيرًا إلى: “بدأنا السنة دي عملي بدري، ونزلنا تدريب في الشركة وقعدنا هناك أيام كاملة.. وكمان كنا بندخل في مسابقات على مستوى الجامعات، وكان لازم نذاكر للمسابقة وفي نفس الوقت نذاكر للمذاكرة العادية، فكان في ضغط كبير.. وحققت هدفي بتوفيق ربنا”.

كما أشار محمود إلى التحدي الأكبر الذي واجهه خلال العام الدراسي، وهو كيفية التوازن بين المذاكرة والمشاركة في المسابقات، حيث قال: “الجزء الأصعب في السنة دي كان إزاي أوازن بين المذاكرة والمسابقات.. ودي كانت حاجة اتعلمتها إني أرتب وقتي كويس، في المدرسة كمان كان في اختبارات وامتحانات باستمرار علشان يقيموا مستوانا ويشوفوا إحنا وصلنا لفين”.

وأبرز محمود الدور الهام الذي لعبته والدته في دعمه، حيث ذكر: “والدتي كانت أكتر حد دعمني، وفرت لي جو مناسب للمذاكرة، وحتى وقت الامتحانات خدت إجازة من شغلها علشان تبقى جنبي لو احتجت حاجة.. بهدي لها النجاح ده كله”.

وفي ختام حديثه، عبّر محمود عن فخره بتخصصه في البيو تكنولوجي، مؤكدًا: “نفسي أكمل في مجالي وأسافر وأطور من نفسي.. والدبلومات الفنية مش حاجة وحشة، بالعكس، اللي يدخل المجال ده ويجتهد هيقدر ينجح ويحقق حاجات كتير جدًا”.